الجراح مصباح المهدي

الجراح

الجراح ما بقًتش بنت الجراح

بنت نار الوجد ، صهد الهوى

الجراح ع الشاشه عيِّل هوى

في أتون المحرقة ما طلعش

الجراح ع الشَّاشه صورة نعش

فوق كتاف طاير إلي المنتهى

نقل خارج دايرة التفاصيل

الجراح تكبر شجر مستحيل

فوق سطوح الدِّيك صرخ مستجير

الجراح ما بقتش قطن وشاش

في غرف إنعاش بدون أجهزة

معجزة لو حد يخرج سليم

الكلام ع الأرض راجل لمدفع

الكلام في غزة مصنع بطولة

والكلام ع الشِّاشه سيرك الحواه

والكلام ف الخطبه قبل الصلاة

عن جراح تنقض تمام الوضوء

حارقة فيَّا الدانه نفس الحروق

قاصفة فيَّا الطلقة نفس الدماغ

لسه عايش لسه نفس الدماغ

بين كلام  ع الأرض والشَّاشة

بنت إيه الخطبة ف المكرفون

بنت إيه القعدة والتحليلات

في دفا الإستديو سحر البلاغة

واللصوص اللي اشترو م الساغة

كل سيغه لأم ماتت ف غزَّة

الجراح في غزَّة دم ف رقبتي

لو رقبتي تسد دم الضحايا

الجراح ما بقتش صورة ف قصيدة

الجراح في غزه أمى البعيدة

سايبة بز في بق عيل شهيد

الجراح من تحت ردم الضحايا

نار تقيد في الحي يلحق أخوه

الولد في الصورة شيخ دوَّخوه

مر فيه مشرط طبيب الجراحه

مر فيه مشرط سلاح البجاحه

الجراح ما بقتش بنت الحصار

بنت ضغط الفقر تل الهموم

الكلام ملموم ف برميل زبالة

الصور عمَّاله تكوي الحروق

قلبي مش صندوق بريد الاحتلال

نفسي لو صندوق رصاص للنضال

نفسي لو معجون رغيف للغلابه

السباع في الغابه تكسب نزال

بس مش ف إديها تمحي الرجال

فيه هنا فلسطين وفيه أطفال

مؤمنين بالدين وعد بالنصر

مؤمنين بالوحدة خارطة طريق

مش طريق قاطع طريق سفَّاح

الجراح ما بقتش بنت الجراح