سأراك في وقت لاحق...هدير زكريا

لو بتفكر يا حزن تجيني لا متجيش
ما هو انت اصلا حد ميهمنيش
بطل بقي حركاتك الخايبة دي
وبلاااااش تشويييش
و ان كنت عامل فيها عسكري
فانا بقي الشاااويش
فكك مني ياعم و سيبني اصلي
متعودتش ازعل علي حد ميساويش
ولا يستاهل دمعة مني و لا حزني
لا لا لا في الجو دة انا مليش
دة لو فكرت بمليون خدعة تجيلي
بيها هقولك انسي مفيش
و هتزهق و تدور علي غيري
فبلاش من اولها عليا تعيش
واللي انت فاكرني زيه
لا ده ميشبهنيش
خد بعضك وامشي من سكات
دة انا قلبي اقوي من اي اشتغالات
منك ومن امثالك لا مبتدخلش عليا انا اي حركات
يا عيني يا حزن صعبت عليا
جالك اللي وقفك يا عنيا
وطردك للابد من جوااااه
مبقاش ليك ولا ليا
يلا يا شاطر العب غيرها
مع حد ضعيف يشيلها
اصلك عمرك ما هتكون قدي
مهما حاولت ووقفت ضدي
تيجي فين انت جنب تصميمي و عندي !!
يلا يا عم روح ده انت فترة و تعدي
و انا قلبي جامد مش بضربة منك هيصدي
فوق من وهمك و انسي و هدي
اصلك هتتعب من عزمي و صدي
و هخليك تتمني موتك او بعدي