مش عارفة ليه ؟

أمي كانت بتضربني كتير

بتقول عليه لكيعة في المشاوير

حلفت لها إني باجري

بس الهوي هوه إللي

بيطير ضفيرتي وكل شوية ألملمها

فحلفت لتقصها لي

فبكيت واشتكيت لعمتي

إللي كانت بتحبني

ودايما بتتخانق عشاني

بصيت في ايدها اليمين

مالقيتش دبلة

ولا في ايدها الشمال

لقيت

مع إنها داخلة في الخمسين

فعرفت

إنها بايرة

أمي قالت لي كده

مفيش عرسان بيطلبوها للجواز

مع إني شفت صورتها

من زمان

جوه برواز إزاز

حلوة بتضحك

بس فيه ملاحظة

زي ما تكون الصورة

مقطوعة

وكان فيه حد

عشان إيده كانت

علي كتفها محوطاها

فلما سألتها

قالت :

ده كان حببي

ولما أبوكي شافني

وأنا بابص له

من وراه

طرده وهددني إنه هايموتني

لأني حبيته

والحب في شرع البنات حرام

فضل أبوكي يتحداه

صبح وليل

لحد ماطفش

وخطفته مني

هوانم بنت الجيران

اتجوزها

وخلفوا

صبيان وبنات

وانا أهه فضلت

قاعدة جنب أمي

أستني أي عريس

مفيش فايدة

أحط أحمر ساعات

وبرده مفيش فايدة

قوليلي طب أعمل إيه

والبنات كتير حواليه

ولا فيش عرسان

القطر فات

ضحك السكات

وقال كل سنه وانت عانس

والناس بقي مقامات