ملصقات آخر وجاهة بقلم ماجدة سيدهم

ما عنديش بطاقة انتخابية- مش غريبة - فيه ناس كتير كده وأهمهم صاحبتي شوقيه اللي معجبة أوي زى بالصور المتشعلقة على الجدران والواجهات والبلكونات والعواميد وع الهوا اللي بنتنفسه - وعندها هواية القعدة على الأرصفة وقراية ملامح الشقا والتعب على وشوش الغلابة وملامح صور الناس الحلوة المرشحة (بضم حرف الميم وفتح حرف الراء – التشكيل مهم برضة تحسبا لسوء الفهم والنية ) أو نخليها احسن المترشحة - ونحب أوي نخترع التعليق اللايق عليها -موسم انتخابات بأه فرصة الرغي المرحرح - وساعات النسمة الحلوة تطيرها شويه وتدلعها شويتين لو هي يعنى الصور دي متعلقة على حبل من عمارة للعمارة اللي قصادها بطول الشارع وعرضة وعليها كرانيش ملونه وبلالين منفوخة أد كده كلها فرقع- برضه عادي وليهم صور( الناس الحلوة ) روعة آآآد كده بالحجم العائلي- شوفي التناكة والشياكة والعظمة، اللي مربع أيده على صدره بتقل وأنعرة واللي منزلها جنبه بالآطة ويا أرض أتهدي .. واللي بيزعق وادامه ميكرفون ورافع ذراعه آل يعني جاب الديب من قفاه .!! ،وأبو نظرة حنينه والجريئة والمسهوكة وصورة حضرته جنب الريس و المحافظ ومدير الأمن والتعليم والتموين والمجلس المحلي والشؤن الاجتماعية وشئون الهجرة – هو ليه ماحدش فكر يتصور جنبي هو مش أنا الشعب- أنت عندك بطاقة انتخابية – لاء. يبأي انت خارخ نطاق الخدمة والكلام والموضوع أساسا.. شوفى الضحكة العريضة دي منرفزاني أوي ،هو بيضحك على ايه ؟" عليكو طبعا " - شكله كده مش حاسس بحاجة خالص وتقريبا كده العيش بيجيله لحد بيته ولا تفتكري بيقف أول الطابور ..؟ يا سيدي ع الروقان ..والله باشا.. دا مؤهل يعني مؤهل مرسومة عليه أوي –البصة اللي كلها معاني وكلام كبير ، يالهوي على دا غموض يسحر ..ولاّ على دا شانبر نضارة " طلعلي ماركة الشانبر وحياة أبوك أصل فلا ن الفلانى بيتفشخر علينا ..و فاكر نفسه الوحيد اللي لابسها وأهل الخبرة المحنكين نصحوني انها بتعمل شغل مية ميه، الناس برضة بتاخد بالمنظر والوجاهة مهمة فوق " ، طب شوفي اللي جنبه شكله كده بيستحلف " ولسه ياما هاتشوفوا.. ان ماجبت نفسكوا الأرض ..." – ودا حالق دقنة حتة دين حلقة ولا غلطة – من كتر ما هو متلمع تحسي انك شامة ريحة الكالونيا اللي خرمت الصورة .. بارفان ياهبلة .. طب بصي .. بزمتك مش دا عامل زى الفتوة فارد صدره " أوعي أنا اللي فيهم بس انتخبوني وشوفوا هاعمل عشانكم يأهل حتتى إيه!

.هاعمل فى كل حارة وزقاق مركز تجميل وكوفي شوب واحمل على عاتقي مسؤولية تعليم كل فئات الشعب الموكوس فن الاوتيكيت وتنسيق الزهور ."

دا طبعا على سبيل لو حد شاف وشه بعد كده ، يا روحي على المسمسم دا حبيب امه يا صغنن " صدقوني دى أول مرة لي وأوعدكم ها حل كل مشاكلكم اللي ما بتتحلش أبدا ولا عمرها ما تشوف رجا .. بس أبوس أيدكم انتخبوني وماتكسروش خاطر ماما وتكسفونى وتكسفوها ،ها تشمت فيها طنط إجلال – اكمن أنكل جوزها متربع من زمان يعني "– ولاّ دا كمان صورته ممكن تقول " ايوه هي عافية ومسنود أوي، بيكم ومن غيركم ياهبل واصل واصل ،انتم ياعسل مش اكتر من تحصيل حاصل " ودا كل مره نشوف وشه هو مابيزهقش " والله والله والله المرة دي باتكلم جد " ايه بتضحكي عل ايه .. لالا اصل دا ياعيني كل مرة يرشح نفسه مرة يطلع بدأن ووراه الكعبة ومرة حالقها ووراه ابو الهول " عادى جدا تغير اتجاهاتك ومبادئك وقيمك مادام عرفت منين تهبر الورك " والله معه حق راجل صاحب مبدأ برضة الواحد يحط فيه كل ثقته وهو مغمض – ما هو عشان كده كلنا عمي ، ودا حضرته يعني لما يحط وراه العلم ولاّ حتى يطلع وهو بيلهف طبق كشري بالشطة- معناه انه وطني وواقع في غرام مصر- والنبي بس لما يحب شارعنا ابو حفر ومطبات وبلاليع مفتوحة وميه شرب داخل عليها المجاري يبأى يحب المطبات والحفر بتاعة الشوارع التانية – أنا مستغربة من ابوعيون جريئة .. تفتكري ايه احسن تعليق له " ايوه تاريخى مافيهوش حاجة عليها الإيمة– تافه جدا -لكن اشمعنى أنا ما الكل بيرشح نفسه يعني جت عليا وانتو عارفين ان ماكنتش انا هايبئ غيري "بزمتك ونور عنينك مش تحسي كلهم أخوات أو قرايب لابسين نفس البدلة ونفس الكرافتة - أكيد دى تعليمات المصوراتى اللي في أول الشارع - كلهم متصورين عنده أصل عنده كاميرا هايلة فيها إمكانيات تهبل ، حتى نفس البروفيل ،ابتسامة خفيفة يا باشا ، راس معاليك كده شوية ، لالا إدينى اكتر ، الظريف وعجب العجاب إن في الآخر بأة تكتشفي إنهم مش أخوات ولا حتى قرايب من بعيد، لكن بيطلعوا شخص واحد ما بيتغيرش على طول التاريخ معانا.. يمكن الاسم يختلف شوية الشكل برضة لكن فحوى المضمون الجواني أوي واحد أحد ، صاحبتي شوقيه صرخت فجأة ، بصي بسرعة شوفي مين دا مش دا "...." أي والله هو بشحمه ولحمه اللي كان معانا فى الفصل زمان ف مدرسة "...." يانهار كحلي – وايه اللي عمل فيه كده – يا سبحان الله مش دا اللي كنا نئعقد نضحك عليه لما كان يتظبط وهو بيغش ويقوم بالع البرشام ف لمح البصر ويفضل الأستاذ يضرب فيه وهو يحلف بايمانات الدنيا والدين ولا يئر أبدا –فاكرة لما كان يئعد يعيط ويصعب علينا نتلم كلنا زى الهبل نطبطب عليه نديله سندوتشتنا واقلامنا ويرجع تاني يوم يبيعها لنا تاني ،اهو يا ستي واصل كفاحه المستمر وهو اللي بيضحك دلوقت – فكرك دا ممكن يعبر عن الشعب ، دا هو احسن من يعبر عنه وغيره كتييير ،هو بيشتغل ايه – صورته كده بتقول " أنا بتاع كله " ولا المسكين دا كمان تحسى من ملامحه بتوسل " ياجماعة انا بعت اللي ورايا وادمي عشان اللحظة دى وإنشاء الله لما أعوض كل اللي انصرف واترستأ هافوق لكم بس وقتها فكروني لان الطلبات هاتبأي متلتلة على راس أمي " وايه دا كمان " حلو اللعب مع الكبار دا عالم تاني خالص " طب اقري معايا شوية الكلام المنقي العسل دا .. كله عن الإيمان وإنكار الذات والإخلاص والحب والإخاء والعهد على استكمال المسيرة - هي المسيرة بدأت.. ومنين وامتى والله ماحد قالي- حاجات غريبة بتحصل في البلد ..بس هي مسيرة ايه بالضبط – - ومعا نحو التقدم للوراء والأمام لو أمكن ..بالضبط أكني اقرا موضوع انشا عن الغيبوبة - مش ملاحظة ان الستات مش باينين وكمشانين رغم إن الجو مولع خصوصا الجداد وأكن كل واحدة بتقول "أ هي محاولة يا صابت ياخابت مش هاتضر " الأمل ف المرة الجاية بس يبأى عرفتوني " طول ما احنا ماشين نتفرج ونعلق لحد ما أتهد حيلنا من الفرجة ، قعدنا ع الرصيف ، تفتكري دول اللي هايحلوا المعضلة –كانت اتحلت قبل كده، دول بالكتير يتكلموا عنها - بدليل المشاكل رطرطت واتعقدت وذادت بشكل مخييف .... ياهوووو. ، على فكرة احنا ما عندناش مشاكل هي مشكلة واحدة بس كبيرة حبتين لالا عشر حبات لالا مليون حبة ..بجد ايه هي .. اللخبطة والمصيبة ان اللخبطة نفسها اتلعبكت ،مش ساعات كده تحصل قفلة فى المرور وتلاقي الدنيا كلها وقفت وماتسمعيش غير زعيق وكلاكسات وصفافيروكل واحد يرمي الغلط على غيره وانه حمار مابيعرفش يسوق – وانه سبب الربكة وتدب خناقة معتبرة ، وممكن واحد ابن حلال متفائل ينزل يحل الأزمة اجتهادي ، وممكن كمان سبب الربكة مقنع جدا يكون فيه إصلاح فى المجاري وسط الشارع وفي عز الضهر ،او حد منهم بيعدي فلازم الحال يقف طبعا ،كله مع بعضه- والاشارة تقفل على بعد كيلو والدنيا حر والمواعيد تبوظ وماتعرفيش تروحي فين ولا تعملي حاجة – حالة شلل جماعي شلل بالكوم لا تروحي ولا ترجعي، ورني بأه- ويا سيدي لو حد فى ضيقة ولا ميعاد مهم يتمني وقتها يلاقي اي حيطة عشان يضرب راسه فيها رغم إن فيه بديل تاني أحسن أسهل وأسرع وف متناول رجله – وأجمل حاجة ناس كبرت دماغهااا – نفضت من زمااان – تقفل إزاز العربية عشان المكيف وشغلت شريط أغاني مروشن وأهو يتسلوا على مشهد مسخرة عسل ، لكن دا ما يمنعش ان عندنا تكاثر ذاتي في حجم الندوات والمؤتمرات والتصريحات والتوجهات والتوصيات والقرارات والسرقات والانهيارات والمسلسلات والكليبات والخناقات والتناقضات .. هى دى الخلطة السحرية يا شوقيه .. وبرضة بنحبها ..هي دي المصيبة ،معاكي بطاقة انتخابية ..لاء.. يبأى مكانك ع الرصيف ولا ّمالكيش مكان من اصله – بس أكيد في أمل وفيه صور لناس بجد كويسة.. دى مش جوافة هانقيها، الأفص ملخبط كده على بعضه ،اهو مثلا الصورة دى ممكن تقول " ايوه بانحت ف الصخر وحاسس أنى بأدن ف مالطة و جالى أمراض الدنيا " و مادمنا ع الرصيف يا صحبتي يبأى من حقنا نقول مطالبنا بصوت عالي و بحريتنا المكفولة بحق الزن مادام ماحدش بيسمعنا.. أول حاجة ..نطالب نحن الشعب المرمي برة الدايرة .. فك الشفرة الغامضة للرموز المرفقة بجوار كل مرشح(مع مراعاة التشكيل الصحيح تحسبا ل...... انظر أعلاه ..) ، مثلا يعنى ايه رمز الإدرة ..وحدوة الحصان وعصاية الغلية والفيشة ومنفاخ العجلة والفاس اللي وقعت ف الراس وخلافه ، هذا التوضيح مش لينا ، لكن من اجل المواطن أبو بطاقة ورقم وصورة ، وضروري نعطيهم دورات تدريبية بأعلى مستوى وياريت تكون بالانجليزية الفصحى لو أمكن- الثقافة مهمة ووجاهة ، ودا للتعرف على الرموز وحفظها وتسميعها وتكون في احد المولات أو الفنادق الفخمة- واهي فرصة الغلابة يدخلو يشوفوا ويتفرجوا شوية ، وتشجيعا لهم يمنح المتدرب الشاطر المطيع في آخر الدورة مزيل عرق أو طرح حريمي ولاّ مكوة أو وممكن جدا وجبة سخنة خمس نجوم أو أي بديل آخر ، ثانيا: ليه من أساسه ماتتغيرش الإشارات الملغزة دي ونستبدلها برموز أشيك واحدث مثلا ايه رأيكم في زهرة التيوليب .. مفتاح صول. .ذيل الطاووس ..أو بايب أو ريموت كنترول تمشيا يعنى مع التقنية برضة ،أو احمر شفايف أو برنيطة ولاّ خاتم لازوردي للمرشحة مثلا ، وممكن نحط صورة لمطرب أو ممثل بنحبه جنب كل مرشح- ودا هايكون أسهل وأريح من الحيرة ووجع الدماغ- المواطن يعلم على صورة الفنان اللي بيحبه وخلصنا ، الاقتراحات كتيرة ..ثالثا:مطلب عبيط وبسيط أوي يا تري فيه أمل تترصف وتنضف الشوارع الجوانية والبرانية شوية صغيرين بس نعرف نمشي ،ويا تري هايجى اليوم اللي نعرف نفرق فيه مابين ميه الصرف وميه الشرب وان دا له مواسير ودا له مواسير تانية خالص ، المحاولة دلالة خير ،احنا مش ها نغوط فى الاحلام ولا هانتكلم في البلاوي المتلتلة اللي زهقنا من الكلام فيها لكن ياترى هل فيه أمل -تحصل المعجزة و تتحل المأساة اللولبية والمرورية في الدخول والخروج من مدينة هنااك على الخريطة اسمها طلخا ..! لو الحلم ها يزعل بلاش من أساسه يتئري – وتحسبا لكل الاعتبارات آآدي الورق اهو حتت حتت ولا أكن حاجة انكتبت ..! يالاّ ياشوقية نشوف رصيف تاني نحكي فيه بصوت عالي.

ودمتم يا أعزائي فوق متعلقين ودمنا نحن تحت ارفانين مادمنا كلنا فوق وتحت متخبطين ..لكن ع الرصيف مش هانبطل نحلم .. ايه رأيكم ماتنزلوا احسن ع الرصيف واحلموا معانا ..